‘No vax, no work’ ipapatupad sa PNP
MANILA, Philippines — Ipatutupad ng Philippine National Police (PNP) ang ‘no vax, no work policy ‘alinsunod sa ibinabang resolusyon ng Inter-Agency Task Force (IATF) bilang bahagi ng health protocol upang maiwasan na magkahawaan sa COVID-19.
Ayon kay PNP Chief P/Gen. Dionardo Carlos, magpapalabas ng memorandum ang PNP para pagbawalan ang mga unvaccinated personnel nito na magreport sa trabaho alinsunod sa IATF Resolution (HR) 148B at 149.
Sa tala ng PNP, nasa 1,040 pang PNP personnel mula sa kabuuang 225,676 o 0.45 % ang hindi pa nababakuhanan na wala namang malinaw o sapat na katwiran.
“The resolution states that unless the public or private employee can provide proof of their vaccination, he/she shall not be allowed to report for work and entry into the branch,” anang IATF Resolution.
Samantala ang hindi pa nababakunahang mga empleyado ay maaring bumalik sa trabaho sa pamamagitan ng pagpiprisinta ng negatibong resulta ng RT-PCR na isusumite kada 2 linggo.
Ang mga nakatanggap naman ng 1st dose at naghihintay pa ng iskedyul ng second dose ay kailangang magsumite ng negatibong resulta ng RT-PCR test.
Ang mga walang negatibong RT-PCR test ay mamarkahang absent sa trabaho na awtomatikong ibabawas din sa leave credits ng mga ito.
“In case that neither sick leave nor vacation leave is available, the no-work no-pay rule shall apply,” paliwanag pa sa IATF Resolution na susundin ng PNP.
“We have exerted all effort to convince our personnel to be vaccinated against COVID-19. We understand that this may be a matter of their personal choice but our priority is the general welfare at this time of pandemic,” paliwanag ng PNP Chief.
Inihayag pa ni Carlos na mahalagang bakunado ang kanilang mga tauhan lalo na at tagapangasiwa ang mga ito ng peace and order.
Kokonsultahin naman ng PNP ang IATF para mabigyan ng konsiderasyon ang may mga matibay na dahilan para ’di magpabakuna tulad ng kumplikasyon sa kalusugan.
- Latest
