Mae-expire na bakuna pinasisilip ng Palasyo
MANILA, Philippines — Iniimbestigahan na ang mga napaulat na mga COVID-19 vaccines na hindi nagamit ng ilang local government units at malapit nang ma-expire.
Ayon kay Cabinet Secretary at acting presidential spokesperson Karlo Nograles, ongoing pa rin ang imbestigasyon at wala pang konklusyon kaugnay nito.
“Doon sa nag-front kasi na isang report na may nag-expire or hindi natanggap, we are still doing fact finding investigation. Wala pa kaming conclusion with regard to that, siyempre may natatanggap kaming report on the ground na dito sa ilang LGU may nag-expire raw, ganito raw. But right now we’re still doing the fact finding,” ani Nograles.
Sinabi rin ni Nograles na ini-evaluate na ang expiration date ng mga bakuna at inuunang ilabas ang malapit nang ma-expire o ‘first in, first out.’
Ayon pa kay Nograles, nakikipag-ugnayan na rin ang vaccine cluster sa manufacturer tungkol sa expiry date ng mga bakuna bukod pa sa isinasagawang evaluation.
Nagsalita na rin aniya si Secretary Carlito Galvez na magagamit pa rin ang mga nag-expired ng bakuna base sa assessment ng mga manufacturers at mga eksperto.
- Latest