Pharmally execs ililipat sa Pasay jail

MANILA, Philippines — Nilagdaan na ni Senate President Vicente Sotto III ang kautusan para ilipat sa Pasay City Jail si Pharmally Pharmaceutical Corporation director Linconn Ong at corporate secretary at treasurer nito na si Mohit Dargani.

Ang commitment order na nirequest ng Senate Blue Ribbon committee ay naka-address kay Supt. Ramil Vestra, warden ng Pasay City jail.

Ang nasabing kautusan ay inilabas matapos na irekomenda ni Senate Sergeant at Arms Rene Samonte ang paglilipat sa detention cell nina Ong at Mohit dahil sa hindi pagsasabi kung nasaan ang mga dokumento ng kumpanya tungkol sa financial statements nito.

Sinabi naman ni Samonte na nakita na niya ang commitment order kaya ililipat na nila ang dalawang opisyal ng Pharmally mula sa Senado patungong Pasay City Jail na inaasahan ngayong tanghali.

Samantala, mananatili naman sa Senado si Twinkle Dargani, presidente ng Pharmally.

Muli namang itinakda sa Disyembre 3 ang pagdinig ng komite kaugnay sa umano’y overprice na pagbili ng COVID-19 supplies ng gobyerno noong nakaraang taon.