Crime rate sa Pinas, bumaba ng 34%
MANILA, Philippines — Ipinagmalaki ni Department of the Interior and Local Government (DILG) Secretary Eduardo Año na bumaba ng 34% ang crime rate sa bansa sa ilalim ng pamumuno ng administrasyong Duterte.
Ayon kay Año, mas nakararamdam na rin ang publiko ng kaligtasan ngayon dahil sa palagiang presensya ng mga pulis at suportang mga programa ng pamahalaan sa mga komunidad.
Sinabi ng kalihim na ang mga naging hakbangin ng kapulisan at pamahalaan ang dahilan kaya malaki ang ibinaba ng naitalang mga nangyaring krimen sa bansa.
“Dahil din sa mga hakbanging ito ay bumaba ang dami ng krimen sa ating bansa ng 34 percent, at mga index crime ng 70 percent noong 2020 kumpara sa taong 2016, at patuloy po itong bumababa ngayong taon. Kahit po sa survey, masasabi po na ang mga kababayan natin ay sabi nila ay mas feel nilang ligtas sila,” paliwanag ni Año sa ginanap na Talk to the People ng Pangulong Rodrigo Duterte kamakalawa ng gabi.
Iniulat din niya na mula sa kabuuang 139,111 insidente noong 2016, ang bilang ng index crimes ay bumaba sa 41,260 noong 2020 at 27,523 sa unang siyam na buwan ngayong taon.
Kabilang sa index crimes ang murder, rape, robbery, aggravated assault, burglary, larceny, motor vehicle theft, at arson.
Dagdag ng kalihim, napababa at napabuti ang ‘crime situation’ sa ilalim ng administrasyong Duterte, matapos na bumaba ang trend mula 584,883 noong 2016 habang 383,189 nitong 2020, at 282,631 sa unang walong buwan ngayong 2021.
- Latest
