30 public schools lalahok sa pilot run ng face-to-face classes sa Nobyembre 15
MANILA, Philippines — Nasa 30 public schools ang lalahok sa pilot implementation ng limitadong face-to-face classes na nakatakdang idaos sa bansa sa Nobyembre 15, 2021.
Ayon kay Education Assistant Secretary Malcolm Garma, kabuuang 638 paaralan ang nagpahayag ng kahandaan na lumahok sa limitadong face-to-face classes.
Sa naturang bilang, 59 ang nakapasa sa risk assessment ng Department of Health (DOH) ngunit 30 pa lamang sa mga ito ang matutuloy na sumali sa naturang dalawang buwang pilot run.
Tatlo sa mga naturang paaralan ay nasa Bicol Region, tatlo naman sa Western Visayas, walo sa Central Luzon, walo sa Zamboanga Peninsula, anim sa Northern Mindanao, at dalawa sa Soccsksargen.
Inaasahan nilang madaragdagan pa ang naturang bilang ng mga paaralan hanggang sa tuluyang maabot ang maximum 100 allowed schools.
Sa ilalim ng guidelines na ipinalabas ng DepEd at DOH, tanging mga fully vaccinated na school personnel lamang ang papayagang lumahok para sa naturang pilot ng face-to-face classes.
- Latest