Tagumpay vs communist terrorist nalalapit na
MANILA, Philippines — Tahasang sinabi ng hepe ng Philippine National Police (PNP) Directorate for Operations, na si Major Gen. Rhodel O. Sermonia na malapit nang makamit ang tagumpay sa pakikipaglaban sa CPP-NPA-NDF.
Sa ‘virtual’ na balitaan ng National Task Force to End Local Communist Armed Conflict (NTF-ELCAC), sinabi ni Sermonia na ang PNP kasama ang lahat ng sangay ng pamahalaan sa pagsusulong ng “whole-of-nation approach”, ang tatapos sa limang-dekada ng insureksiyon ng CPP-NPA-NDF bago pa matapos ang termino ni Pangulong Rodrigo Duterte sa June 30, 2022.
Ani Sermonia, matapos ang limang-dekada tanging ang Administrasyong Duterte lamang ang determinado na pagsama-samahin ang lahat upang masolusyunan ang problema ng insureksiyon.
Sa mga nagdaang taon lamang aniya nakita ang unti-unting tagumpay gaya ng pagsasabatas ng anti-terror bill at ang pagbansag sa mga CPP-NPA bilang mga terorista, at maging ang mandato ng Executive Order 70 na nagtatag ng NTF-ELCAC.
Binigyan diin pa ni Sermonia na ang pagtatagumpay laban sa CPP-NPA-NDF ay dahil na rin sa mahusay na paninindigan ni Duterte upang wakasan na ang paghahari-harian ng mga komunistang-terorista.
- Latest
