Parak, timbog sa indiscriminate firing
MANILA, Philippines — Isang pulis ang inaresto ng kanyang mga kasamahan matapos na magpaputok ng baril sa Brgy. Mariblo, Quezon City kamakalawa ng gabi.
Ang suspek ay nakilalang si PCpl. Lester John Dela Vega Solano, 33, nakatalaga sa Tactical Motorcycle Riders Units (TMRU) ng Manila Police District (MPD) Sta. Cruz Police Station 3, at residente ng Brgy. San Jose, Quezon City.
Batay sa ulat, dakong alas-10:08 ng gabi kamakalawa nang maganap ang insidente sa may basketball court, na matatagpuan sa Bernardo St., Brgy. Mariblo, sa lungsod.
Nauna rito, humingi ng police assistance si Kagawad Jun Obiña, ng Brgy. Mariblo, sa Masambong Police Station 2, ng QCPD, dahil sa umano’y pagpapaputok ng baril ng suspek, sanhi upang matakot ang mga residente.
Mabilis namang rumesponde ang mga pulis at kaagad na inaresto ang suspek, na hindi na pumalag at kusa nang isinurender ang kanyang .9MM na baril.
Hindi naman binanggit ng pulis ang dahilan ng kaniyang pagpaputok ng baril sa kanilang barangay.
- Latest
