‘The best na bakuna at gamot’ vs COVID-19, target ni Doc Willie
MANILA, Philippines — Tututok umano si Doc Willie Ong sa pagpapa-lakas sa ‘healthcare system’ ng bansa at paglaban sa COVID-19 sa pagkuha ng pinakatamang bakuna at gamot para sa mga Pilipino.
Ito ang idiniin ni Ong sa kaniyang talumpati sa opisyal na deklarasyon ng kaniyang kandidatura sa pagka-Bise Presidente sa darating na halalan sa Mayo 2022 katambal si Manila Mayor Isko Moreno bilang kandidato sa pagka-Pangulo sa ilalim ng partidong Aksyon Demokratiko.
“Ano goal natin, sim-ple; eto ang kaya ko, eto madali sa akin. ‘Yung mga darating, ‘yung isasaksak the best, ‘yung gamot the best,” ayon kay Ong nang pormal na magdeklara ng kandidatura
“’Di ko sisirain [ang] pa-ngalan ko para doon, the best na gamot, the best na gamit, kung ano ang kinukuha sa America sa Europe, kawawa naman kung wala tao nun,” dagdag niya.
Ngunit ibinunyag ni Ong na isang beses niyang tinanggihan ang alok ni Moreno na sumama sa kaniyang tiket dahil wala talaga umano ito sa kaniyang plano. Nagdesisyon siya na tanggapin ang alok nang mamatay ang kaniyang ina at makita na kailangan pa niyang magsagip ng mas maraming buhay.
“Isa pa nakita ko kay Yorme, kailangan natin ngayon health workers. Nakikita ko mga doctor nag-iiyakan na, nagmamakaawa mga nurse. Never ko nakitang umiyak ‘yan,” saad pa ni Ong. “Eto na opportunity, sino ba ako para tumanggi?” giit niya.
May panawagan din siya sa mga kapwa niya health workers, kailangang bumalik na sa trabaho sa mga ospital at huwag munang maghintay ng Mayo. Kailangan umanong tumulong ngayon dahil sa buhay ang pinag-uusapan sa kasalukuyan,” dagdag niya.
- Latest