Porsyento ng nasasawi sa COVID-19 sa 'Pinas bumaba kahit kaso 3x inilaki ngayong 2021
MANILA, Philippines — Bagama't papalaki nang palaki ang bilang ng bagong COVID-19 cases sa Pilipinas, lumalabas na papaonti nang papaonti ang porsyentong namamatay mula sa mga infections, pagbabahagi ng Department of Health (DOH).
"The Department of Health (DOH) today reported a decrease in the 2021 case fatality rate (CFR) among COVID-19 cases despite cases increasing by three fold, comparing 2021 and 2020 cases," wika ng DOH sa isang pahayag, Miyerkules.
Lumalabas sa datos ng DOH na bumaba patungong 1.47% ang COVID-19 case fatality rate ng Pilipinas ngayong 2021 kumpara sa 2.47% noong 2020.
Ito'y kahit 309% ang increase sa COVID-19 cases ang naitala mula 2020 kumpara ngayong 2021 (as of September 21).
"The decrease shown in the national case fatality rate was multifactorial. One of the factors that the Department is considering is the overall improvement of the country’s healthcare system over the past year and its ability to cope with the higher demand for clinical assessment, referral, and management of cases," paliwanag ni Health Undersecretary Maria Rosario Vergeire.
"The COVID-19 vaccination program also played a role in the decrease. Vaccines continue to provide the promised protection against more severe COVID-19 and deaths."
Kaugnay niyan, epekto raw ito ng mga etratehiya at behavioral-change campaigns na ipinatupad mula Agosto 2020 para mapababa ang risk ng hawaan at mapabagal ang pagkalat ng COVID-19.
Lumalabas din daw na bumaba nang dalawang beses ang COVID-19 CFR sa hanay ng senior citizens kumpara noong nakaraang taon. Ito'y kahit na mas mataas ang risk ng mga 60-anyos pataas sa mga mas malalang sintomas ng COVID-19 at pagkamatay mula rito.
Hinihikayat ngayon ng kagawaran na lalo pang makipagtulungan ang mga lokal na pamahalaan para pataasin ang natuturukan ng COVID-19 vaccines, lalo na sa mga nasa A2 priority group (senior citizens) para maprotektahan sila sa severe form ng virus na pwedeng mauwi sa pagkasawi.
Sa huling taya ng gobyerno nitong Martes, umabot na sa 2.4 milyon ang tinatamaan ng COVID-19 sa Pilipinas. Sa bilang na 'yan, patay na ang 37,074 sa ngayon. — James Relativo
- Latest
