DOH kumambiyo, pagbakuna sa edad 12-17 ‘di pa aprubado
MANILA, Philippines — Kinontra kahapon ng Department of Health (DOH) ang unang pahayag ng isa nilang opisyal at iginiit na hindi pa umano ganap na inirerekomenda nila ang pagpapabakuna sa mga batang nasa edad 12-17 taong gulang.
Sinabi ni DOH spokesperson Undersecretary Maria Rosario Vergeire na hanggang ngayon ay pinag-aaralan pa umano ng kanilang Vaccine Expert Panel ang kaligtasan at pagiging patas ng pagbibigay ng COVID-19 vaccine sa naturang age-group.
Kabaligtaran ito sa unang pahayag ni Undersecretary Myrna Cabotaje na pumayag na ang VEP na bakunahan ang mga bata at tinitignan na ang buwan ng Oktubre sa posibilidad na pag-uumpisa nito.
“We’d like to emphasize that she (Cabotaje) might just be referring to the emergency use authority given to Pfizer and Moderna,” ayon kay Vergeire.
Una nang binigyan ng EUA ng Food and Drugs Administration (FDA) ang naturang dalawang manufacturers ng bakuna para sa mga bata. Ngunit magagamit lamang ito sa mga bata kung maglalabas na ng rekomendasyon ang DOH at VEP.
- Latest