Namatay sa stroke, halos 100K na
Publiko, pinag-iingat
MANILA, Philippines — Pinayuhan ng mga eksperto ang publiko na mag-ingat sa stroke na kumitil na umano sa buhay ng halos 100,000 indibiduwal noong nakaraang taon.
Base sa datos ng Philippine Statistics Authority (PSA), limang sakit ang pangunahing dahilan ng pagkamatay ng maraming Pilipino noong nakaraang taon tulad ng heart attack, cancer, diabetes, chronic lung disease at stroke na tinatawag ng mga doktor na non-communicable diseases.
Sa webinar naman na pinangunahan ng Menarini Asia-Pac at mga ekspertong doktor, hinikayat nila ang publiko na huwag lamang sa COVID-19 mag-ingat at sa halip ay maging ‘aware’ rin sa iba pang nakamamatay na sakit.
Ayon kay Dr. Marcellus Ramirez ng Philippine Heart Rhythm Society, ang stroke ay kadalasang nauuwi sa heart attack at malaunan ay kamatayan.
Anila, madalas na biktima ng stroke ay ang edad 70 pataas na may mga sakit sa puso, kidney, lung desease, diabetes, high blood pressure, thyroid problems, sleep apnea at metabolic syndrome.
Gayunman, nagbabala si Dr. Johnny Lokin ng Stroke Society of the Philippines, na nanganganib din sa stroke ang mga edad 40 pataas dahil sa sobrang stress, kawalan ng disiplina sa pagkain at kakulangan ng kaalaman tungkol dito.
- Latest
