DOH 'di maiirerekomenda pagboto ng COVID-19 patients sa Comelec polling centers
MANILA, Philippines — Kung Department of Health (DOH) ang tatanungin, ayaw nilang pabotohin sa labas ng kanilang mga bahay o kinalalagyan ang mga COVID-19 positive sa araw ng halalan sa 2022, taliwas sa naunang mungkahi ng Commission on Elections (Comelec).
Una na kasing sinabi ni Comelec chair Sherriff Abas na papayagan nilang bumoto ang mga positibo sa virus sa mga espesyal at hiwalay na isolation centers sa bawat polling center sa ika-9 ng Mayo 2022.
"Alam po natin na ang positibong tao, kapag lumabas po ng kanilang kwarto o kanilang lugar ay pwede pong makahawa ng ibang tao. So sana po Comelec will have an alternative way of having this elections for these COVID positive patients," ani Health Undersecretary Maria Rosario Vergeire ngayong Biyernes.
"Baka pwede naman pong virtual na lang, digital, through SMS [ang pagboto nila] kung makakagawa po tayo ng ganitong proseso, dahil talagang ang Department Health po ay talagang hindi inirerekomenda na ang mga COVID positive patients ay lalabas po ng isolation area to these kinds of activities, because this might have some form of transmission and infect other people."
Aniya, nakabatay naman din daw ang panuntunan ng Comelec sa omnibus guidelines ng Inter-Agency Task Force for the Management of Emerging Infectious Diseases (IATF) at DOH.
Una nang sinabi ni vaccine czar at Presidential Adviser on the Peace Process Carlito Galvez Jr. na pinag-aaralan na ng gobyerno ang posibilidad na magsagawa ng "multiple-day" elections sa 2022 para na rin maiwasan ang pagsisiksikan ng maraming tao sa mga presinto sa iisang araw, na maaari pang pagmulan ng COVID-19 infections.
Gayunpaman, kakailanganin pa raw ng espesyal na batas para maisagawa ito, ani Galvez.
"So sana po Comelec will have an alternative way of having this elections for these COVID positive patients," patuloy pa ni Vergeire kanina.
Sa huling taya ng DOH, umabot na sa 2.3 milyon ang tinatamaan ng COVID-19 sa Pilipinas. Sa bilang na 'yan, pumanaw na ang nasa 36,018 katao.
- Latest
