Cignal kumonekta ng 2 sunod sa Vigan
MANILA, Philippines — Kinumpleto ng Cignal HD ang two-game sweep sa Vigan leg mula sa 25-21, 25-22, 25-16 paggupo sa Capital1 Solar Energy sa 2025 PVL on Tour kahapon sa Chavit Coliseum sa Ilocos Sur.
Nagsumite si Erika Santos ng 11 points mula sa walong attacks at tatlong blocks habang may 10 markers si Rose Doria-Aquino para sa 2-0 kartada ng HD Spikers sa Pool B.
Nagmula ang tropa ni coach Shaq delos Santos sa 25-23, 25-14, 25-23 pagwalis sa Akari sa pagsisimula ng pre-season tournament noong Linggo.
Tumipa si team captain Gel Cayuna ng 27 excellent sets at limang puntos.
“Sobang happy, and of course proud dahil lahat nag-deliver. Siguro iyong effort din nila pagdating ng training naia-apply nila pagdating ng game,” ani Delos Santos.
Laglag ang Solar Spikers sa 0-2 marka kasama ang naunang 10-25, 21-25, 10-25 pagyukod sa Creamline Cool Smashers.
Lumamang ang Capital1 sa first at second set sa likod nina Trisha Genesis, Rovie Instrella at captain Jorelle Singh bago nakatabla ang Cignal sa parehong 19-19.
Matapos ito ay tuluyan nang naagaw ng HD Spikers ang bentahe patungo sa 2-0 lead sa Solar Spikers papasok sa third frame.
Maagang nakalayo ang Cignal sa 9-4 patungo sa 18-11 pagbaon sa Capital1.
Ang pagsawata ni HD Spikers rookie middle blocker Jessa Ordiales sa hataw ni Genesis ang tumapos sa Solar Spikers.
Lilipat ang PVL on Tour sa Batangas City sa Sabado tampok ang mga Pool A teams na Galeries Tower laban sa Choco Mucho at All-Filipino Cup champion Petro Gazz kontra sa Nxled.
- Latest
