Semis duel ikakasa ng SMB, Ginebra
MANILA, Philippines — Isang panalo lang ang kailangan ng San Miguel at Barangay Ginebra sa quarterfinals para maplantsa ang kanilang best-of-seven semifinals series.
Sasagupain ng No. 1 Beermen ang No. 8 at nagdedepensang Meralco Bolts ngayong alas-5 ng hapon kasunod ang bakbakan ng No. 4 Gin Kings at No. 5 Converge FiberXers sa alas-7:30 ng gabi sa PBA Season 49 Philippine Cup sa Ninoy Aquino Stadium sa Malate, Manila.
Humirit ng ‘do-or-die’ game ang No. 6 TNT Tropang 5G at No. 7 Rain or Shine laban sa No. 3 Magnolia at No. 2 NLEX matapos agawin ang 89-88 at 92-89 panalo, ayon sa pagkakasunod.
May hawak na ‘twice-to-beat’ advantage ang SMB, NLEX, Magnolia at Ginebra sa quarterfinals.
Gusto ng Beermen na resbakan ang Bolts na tumalo sa kanila sa finals ng Season 48 Philippine Cup.
“They have a good system so kailangan tapatan din namin energy nila and... kailangan naming mag-focus sa defense and I think offense will come kapag dumepensa kami ng maayos,” ani SMB guard CJ Perez na muling makakatuwang si eight-time PBA MVP June Mar Fajardo.
Handa naman ang Meralco sa malaking hamon para sa pagdedepensa sa kanilang korona.
“We’re ready,” ani Bolts coach Luigi Trillo na natalo sa Beermen, 98-110, sa eliminasyon noong Abril 9. “We’ve been here a lot of times so I think we’d really respond well in this first game. But you have to get to one before you get to two.”
Ang semis spot din ang target ng Gin Kings sa pagharap sa FiberXers na nirapido nila, 85-66, noong Mayo 10 sa San Fernando, Pampanga.
- Latest
