SGA, OKC lalapit sa NBA title

OKLAHOMA CITY -- Hindi pa lumalamang ang Thunder sa kanilang NBA finals series ng Indiana Pacers.

At ito na ang kanilang pagkakataon para ma­agaw ang 3-2 lead at ma­kalapit sa pinapangarap na kampeonato.

Itinakas ni Tyrese Ha­­li­burton ang Indiana sa Game 1 tampok ang kanyang game-winning jumper bago nakatabla ang Oklahoma City sa Game 2 matapos kontrolin ang kabuuan ng laro.

Sa Game 3 humugot ang Pacers ng produksyon sa kanilang bench para sa 2-1 lead sa serye, habang nakabawi ang Thunder sa Game 4 sa likod ng 15 points ni NBA MVP Shai Gilgeous-Alexander sa huling limang minuto ng fourth quarter.

“I think above all, it’s been very fun,” ani Gilgeous-Alexander sa kanyang unang NBA Finals. “It’s been everything I dreamt it to be growing up. There’s no other place in the world I’d rather be, and I’m grateful to be here. Thankful for the ex­perience, for sure.”

Umiskor si Gilgeous-Alexander ng 3,091 points ngayong season — kasama ang regular season at playoffs para sa OKC.

Kailangan pa niya ng 72 points para maduplika ang 3,163 points ni Michael Jordan sa 1991-92 season.

Kumpiyansa si Indiana center Myles Turner na makukuha nila ang 3-2 bentahe sa serye.

“We play better with our backs against the wall,” wika ni Turner. “Adversity is something that’s going to bring out the best in you. I think that’s really what it is, is just a response.... When your back is against the wall, that’s typically where we get our best basketball.”

Ito ang ika-32 pagkakataon na nagtabla sa 2-2 ang NBA Finals patungo sa Game 5.