Blackwater nakuryente sa Meralco
MANILA, Philippines — Tinapos ng nagdedepensang Meralco ang kanilang kamalasan nang basagin ang Blackwater, 103-85, sa Season 49 PBA Philippine Cup kahapon sa Ynares Center sa Antipolo City.
Pingilan ng Bolts ang dalawang sunod na kabiguan para itayo ang 4-5 baraha, habang lugmok ang Bossing sa 1-5 kasama ang three-game losing skid.
Ipinagdiwang ng Meralco ang pagiging ika-99 miyembro ni Chris Newsome sa PBA 5,000-point club.
Tumapos si Newsome na may 19 points at may 14, 13, 12 at 10 markers sina CJ Cansino, Chris Banchero, Toto Jose at Brandon Bates, ayon sa pagkakasunod.
“This is a game that we needed to get,” sabi ni coach Luigi Trillo. “It’s going to be like knockout games everytime.”
Pinamunuan ni Christian David ang Blackwater sa kanyang 24 kasunod ang 23 markers ni Cedrick Barefield.
Mula sa 22-18 abante sa first period ay umarangkada ang Bolts sa second quarter para iwanan ang Bossing sa halftime, 52-39.
Sa likod nina David at Barefield ay nakalapit ang Blackwater sa 51-56 sa third quarter.
Ngunit bumida si Cansino para muling ilayo ang Meralco sa 84-62 sa pagbungad ng fourth canto.
Ang drive ni Cansino ang nagbigay sa Bolts ng isang 22-point lead, 97-75, sa huling 4:46 minuto.
Isinilbi ni forward Cliff Hodge ang kanyang one-game suspension.
- Latest
