Celtics sinibak ng Knicks sa Game 6

NEW YORK — Ang Knicks ang sasagupa sa Indiana Pacers sa Eastern Conference finals series.

Ito ay matapos patalsikin ng New York ang Boston Celtics, 119-81, sa Game 6 at isara ang kanilang semifinals showdown sa 4-2.

Umiskor sina Jalen Brunson at OG Anunoby ng tig-23 points para banderahan ang Knicks sa pagpasok sa kanilang unang conference finals matapos ang 25 taon.

Nagdagdag si Mikal Bridges ng 22 points at kumabig si Karl-Anthony Towns ng 21 markers habang kumolekta si Josh Hart ng triple-double na 10 points, 11 rebounds at 11 assists.

Sinibak ng Pacers ang Cleveland Cavaliers sa kanilang semis series.

Tumipa si Jaylen Brown ng 20 points para sa Celtics na ang leading scorer na si Jayson Tatum ay nagkaroon ng isang ruptured Achilles tendon sa Game 4 at hindi na nakalaro sa Games 5 at 6.

Ipinahinga ni Boston coach Joe Mazzulla ang kanyang mga starters sa third quarter nang matambakan sila ng 41 points ng New York.

Ipinoste ng Knicks ang 49-27 bentahe sa dulo ng second period matapos ihulog ang isang 13-3 bomba at kunin ang 64-37 halftime lead.

Mula rito ay hindi na nakalapit ang Boston.