Ika-2 dikit itatagay ng Ginebra vs Phoenix

MANILA, Philippines — Sa 85-66 pagrapido ng Barangay Ginebra sa Converge noong Sabado sa San Fernando, Pampanga ay humakot si Japeth Aguilar ng 23 points, 10 rebounds at 3 blocks.

Ang mga nasabing numero ang inaasahan muli ng Gin Kings mula sa 6-foot-8 veteran center sa pagsagupa ng Gin Kings sa Phoenix Fuel Masters ngayong alas-7:30 ng gabi sa Season 49 PBA Philippine Cup sa PhilSports Arena sa Pasig City.

Sinagupa ni Aguilar, tubong Sasmuan, Pampanga, sina Converge bigmen Justin Arana at Justine Baltazar para itayo ang baraha ng Ginebra sa 3-2 katabla ang Rain or Shine sa fourth place sa ilalim ng Magnolia (6-0), NLEX (5-1) at San Miguel (4-2).

“He was very detailed in his approach, the times that he got beat, he recovered really well, blocked shots,” ani Gin Kings coach Tim Cone sa 38-anyos na eight-time PBA champion center.

Nagmula naman ang Fuel Masters sa 92-111 pagyukod sa Beermen na naghulog sa kanilang marka sa 2-4.

Sa unang laro, pipilitin ng FiberXers (4-3) na ma­kabangon mula sa talo sa Gin Kings sa pagharap sa Batang Pier (1-4) na bumagsak sa isang four-game losing slump.

Isang 104-105 kabiguan naman ang nalasap ng NorthPort sa nagdedepensang Meralco sa huli nilang laro.