Lakers iniwan ng Wolves sa 2-1
MINNEAPOLIS — Nagpasabog si Jaden McDaniels ng career playoff-high 30 points para tulungan ang Minnesota Timberwolves sa 116-104 pagdaig sa Los Angeles Lakers sa Game Three at agawin ang 2-1 lead sa kanilang Western Conference first-round playoff series.
Humakot si Anthony Edwards ng 29 points, 8 rebounds at 9 assists para sa Timberwolves habang may 22 markers si Julius Randle.
“Jaden never looks tired. He looks like he could play 48 minutes,” sabi ni Edwards sa opensa at depensa ni McDaniels.
Binanderahan ni LeBron James ang Lakers sa kanyang 38 points tampok ang tatlong three-point shots at may 17 markers, 8 assists at 7 boards si Luka Doncic.
Umiskor si Austin Reaves ng 20 points para sa Lakers na ibinaon ng Minnesota sa 114-104 sa huling minuto ng fourth quarter galing sa triple ni Edwards.
“They’re big, they’re long, they’re athletic, they pressure the basketball, they make everything tough,” ani Lakers coach J.J. Redick sa Timberwolves.
Sa Orlando, bumanat si Franz Wagner ng 32 points at may 29 markers si Paolo Banchero sa 95-93 paglusot ng Magic sa nagdedepensang Boston Celtics at ilapit sa 1-2 ang kanilang serye.
Sa Milwaukee, nagsalpak si Gary Trent Jr. ng franchise playoff record na siyam na three-point shots at tumapos na may 37 points sa 117-101 panalo ng Bucks sa Indiana Pacers sa Game Three at idikit sa 1-2 ang kanilang duwelo.
- Latest
