Thunder amoy na ang sweep

MEMPHIS, Philippines — Nagbagsak si Shai Gilgeous-Ale­xander ng 31 points at may 26 markers si Jalen Williams sa 114-108 panalo ng Oklahoma City Thunder sa Grizzlies sa Game Three at itayo ang 3-0 bentahe sa kanilang Western Confe­rence first-round playoffs series.

Nagdagdag si Chet Holmgren ng 24 points sa paglapit ng Oklahoma City sa pagwalis sa Memphis sa kanilang best-of-seven showdown.

Bumangon ang Thunder mula sa isang 29-point deficit sa first half para balikan ang Grizzlies at iposte ang ikatlong sunod na panalo sa serye.

“They built a 29-point lead in a half, so we felt like all we had to do was build our own 29-point lead,” ani Gilgeous-Alexander.

Nagkaroon si Ja Morant ng hip injury sa huling tatlong minuto ng second period kung saan itinayo ng Memphis ang 67-40 bentahe bago naagaw ng Oklahoma City ang kalamangan sa fourth quarter.

Nagtapos si Morant na may 15 points at 5 assists.

Pinamunuan ni Scotty Pippen ang Grizzlies sa kanyang 28 points habang may 22 markers si Jaren Jackson Jr.

Sa Detroit, umiskor si Karl-Anthony Towns ng 31 points at may 30 markers si Jalen Brunson sa 118-116 paglusot ng New York Knicks sa Pistons sa Game Three at kunin ang 2-1 abante sa kanilang duwelo.

Sa Inglewood, humakot si Kawhi Leonard ng 21 points at 11 rebounds para banderahan ang Los Angeles Clippers sa 117-83 pagrapido sa Denver Nuggets sa Game Three at angkinin ang 2-1 lead sa kanilang serye.