PLDT ‘di uurungan ang Zhetysu

MANILA, Philippines — Kailangan nang ilabas ng PLDT ang lahat ng ka-nilang lakas sa pagsa­gupa sa Zhetysu ng Kazakhstan sa knockout quarterfinals ng 2025 AVC Women’s Volleyball Champions Cup.

Lalabanan ng Pool D second placer High Speed Hitters ang Pool A top seed Zhetysu ngayong alas-4 ng hapon sa Philsports Arena sa Pasig City.

“Alam naman namin high level, malakas and all. Pero bilog pa rin naman bola,” ani PLDT coach Rald Ricafort sa Kazakh team.

Sina Fil-Canadian Savannah Davison at Cuban import Wilma Salas ang muling babandera sa High Speed Hitters habang sina Karyna Denysova, Valeriya Yakutina at Tatyana Nikitina ang mangunguna sa Zhetysu.

“So tingnan ulit namin kung saan aabot against Kazakhstan. Pero definitely ilalabas at tatrabahuhin namin. So tingnan natin,” sabi ni Ricafort.

Sa alas-7 ng gabi magtutuos ang Pool A second placer Creamline at Pool D top team Nakhon Ratchasima QminC ng Thailand.

Kagaya ng High Speed Hitters ay kailangan ding ibuhos ng Cool Sma­shers ang lahat ng kanilang ma­kakaya para talunin ang mga Thai spikers.

Pamumunuan nina im­ports Erica Staunton, Anastassiya Kolomoyets at Anastasiya Kudryashova ang Creamline katuwang sina Alyssa Valdez, Jema Galanza, Jeanette Panaga, Mich Gumabao, Lorie Bernardo at setter Kyle Negrito.