Malabuyo, Finnegan wagi ng medalya sa US NCAA

MANILA, Philippines — Inilatag nina Olympians Emma Malabuyo at Aleah Finnegan ang solidong performance upang makasiguro ng medalya sa US NCAA women’s individual gymnastics championships.

Naibulsa ng Filipino-American na si Malabuyo ang silver medal sa ba­lance beam event kung saan nagtala ito ng 9.9750 puntos.

Si Malabuyo ay bahagi ng University of California, Los Angeles (UCLA) gymnastics team.

Hindi rin nagpahuli si Finnegan na nakahirit na­man ng tanso sa floor e­xercise event.

Nakapagrehistro ang Louisiana State University (LSU) standout ng 9.9375 puntos para makapasok sa podium.

Sa katunayan, tatlo silang bronze me­dalist sa floor e­xercise matapos magtala ng parehong puntos sina Skyla Schulte ng Michigan State at  Lily Smith ng Georgia.

Sina Finnegan at Ma­­labuyo ay miyembro ng PH team na su­mabak sa 2024 Paris Olympics kasama sina Levi Ruivivar at world champion Carlos Edriel Yulo.

Subalit hindi pinalad na makapag-uwi ng medalya sina Finnegan, Malabuyo at Ruivivar habang su­miguro naman ng dala­wang gintong medalya si Yulo sa men’s floor exercise at men’s vault events.

Inaasahang ra­ratsadang muli ang na­tional gymnastics team sa 2025 SEA Ga­mes na idaraos sa  Thailand sa Disyembre.