Daep, Roluna binitin ang Altas
MANILA, Philippines — Kumpara sa kanilang limang teammates ay wala pang desisyon sina NCAA Season 100 juniors basketball MVP Lebron Jhames Daep at Jan Roluna kung maglalaro sa University of Perpetual Help System DALTA Altas sa Season 101 men’s basketball tournament.
Umuwi ang 6-foot-7 na si Daep sa kanyang probinsya sa Bicol habang nasa Nasipit, Agusan del Sur si Roluna matapos akayin ang Junior Altas sa kauna-unahang NCAA crown makaraan ang 41 taong paghihintay.
Sa likod nina Daep at Roluna ay pinadapa ng Junior Altas ni coach Joph Cleopas ang St. Benilde-La Salle-Greenhills Greenies ni mentor Ren-Ren Ritualo Jr. sa best-of-three championship series, 2-1.
Samantala, kumpirmado namang maglalaro ang limang miyembro ng Junior Altas sa senior’s team ni coach Olsen Racela sa darating na NCAA Season 101.
Ito ang kinumpirma ni Junior Altas team manager at UPHSD Vice President for Sports Anton Tamayo.
Ang mga ito ay sina NCAA Season 100 Most Improved Player Jericho Cristino, JD Pagulayan, Icee Callangan, TJ Tabbuan at Kelsey Baldoria.
- Latest
