RHJ binuhat sa Finals ang TNT

MANILA, Philippines —  Kumonekta ang TNT Tropang Giga sa kanilang ika-24 finals appearance target ang pang-11 korona.

Ito ay matapos sibakin ng Tropang Giga ang Rain or Shine Elasto Painters, 97-92, sa Game Five ng Season 49 PBA Commissioner’s Cup semifinals series kahapon sa Smart Araneta Coliseum.

Humakot si import Rondae Hollis-Jefferson ng 42 points, 11 rebounds, 4 assists at 3 blocks habang may tig-12 markers sina Calvin Oftana at Rey Nambatac.

Itiniklop ng TNT sa 4-1 ang kanilang best-of-seven semis showdown ng RoS papasok sa ikalawang sunod na finals stint matapos pagharian ang nakaraang Season 48 Governor’s Cup.

“We really showed a lot of heart and guts down the stretch,” ani Tropang Giga coach Chot Reyes. “We just wanted to make sure to stay present and not allow our minds to wander during the ballgame.”

Binanderahan ni import Deon Thompson ang Elasto Painters sa kanyang 34 points at 6 boards at nag-ambag sina Adrian Nocom at Andrei Caracut ng 13 at 10 markers, ayon sa pagkakasunod.

Bumangon ang TNT mula sa isang 13-point deficit, 46-59, sa 7:16 minuto ng third period sa pagbibida ni Hollis-Jefferson para makadikit sa pagtatapos nito, 66-67.

Tuluyan nang naagaw ng Tropang Giga ang 82-77 bentahe sa 5:28 minuto ng fourth period habang nakalapit ang Elasto Painters sa 86-90 mula sa basket ni Santi Santillan sa huling 1:01 minuto.

Ang three-point shot ni Oftana at dalawang free throws ni Hollis-Jefferson ang muling naglayo sa TNT sa 95-86 sa natitirang 22.2 segundo.