Gandler pinalakas ang Cignal sa No. 3 spot

MANILA, Philippines — Humataw si Vanie Gandler ng 15 points mula sa 14 attacks at isang service ace para gabayan ang Cignal HD sa 25-17, 25-15, 25-21 paggiba sa Akari sa 2024-25 Premier Volleyball League (PVL) All-Filipino Conference kahapon sa PhilSports Arena sa Pasig City.

Dumiretso ang HD Spikers sa ikatlong sunod na arangkada para sa 8-3 kartada at kunin ang No. 3 spot sa knockout phase katapat ang No. 10 team.

“I’m super proud of the team. Of course, kasi we had a lot of challenges this year but it was really a total team effort talaga,” sabi ng 24-anyos na si Gandler.

May 12 markers si Roselyn Doria-Aquino kasunod ang 10 points ni Ishie Lalongisip habang nagtala si setter Gel Cayuna ng 19 excellent sets at may 16 excellent digs si libero Dawn Catindig.

“Sobrang happy kasi ito rin talaga iyong target namin na hopefully, makuha talaga namin iyong number three,” wika ni coach Shaq Delos Santos.

Binanderahan ni Faith Nisperos ang Chargers, bagsak sa 5-6 baraha, sa kanyang 12 points at may lima at tig-apat na marka sina Ivy Lacsina, Ced Domingo at Eli Soyud, ayon sa pagkakasunod.

Itinayo ng Cignal ang 15-8 bentahe sa first set patungo sa 25-17 panalo bago angkinin ang second frame, 25-15, tampok ang hataw ni Jovy Fernandez para sa kanilang 2-0 kalamangan sa laro.

Nakipagsabayan ang Akari sa 19-22 sa third set sa likod nina Nisperos, Lacsina at Camille Victoria.

Ngunit umiskor si Gandler para sa 23-19 abante ng HD Spikers hanggang selyuhan ni Jackie Acuña ang pagwalis sa Chargers mula sa kanyang running attack.