Cool Smashers kampeon!
MANILA, Philippines — Napigilan ng Creamline ang matikas na kamada ng Petro Gazz sa pamamagitan ng 20-25, 25-20, 25-18, 25-15 desisyon upang matagumpay na madepensahan ang kanilang korona sa Premier Volleyball League (PVL) All-Filipino Conference kagabi sa dinumog na Mall of Asia Arena sa Pasay City.
Matinding depensa ang naging armas ng Cool Smashers na sinabayan ng solidong laro nina outside hitter Tots Carlos at Jema Galanza para masiguro ng kanilang tropa ang kampeonato.
Ito ang ikaanim na korona ng Creamline sa liga.
“Itong game namin is for our fans and kay ate Alyssa (Valdez),” ani Galanza.
Malaki rin ang kontribusyon nina opposite hitter Michele Gumabao at middle blocker Ced Domingo.
Naging lider naman si libero Kyla Atienza sa floor defense dahilan para makagawa ng magagandang plays si setter Jia Morado.
“Pagkatapos ng Game 1 lahat ready mag-ensayo. I really need to give it to the team also. This conference mas pinanghawakan namin yung relationship namin as a team,” ani Morado.
Tinapos ng Creamline ang best-of-three championship series sa 2-1.
Nakauna ang Gazz Angels nang kunin nito ang 25-22, 24-26, 25-23, 26-24 panalo sa Game 1 bago nakaresbak ang Cool Smashers sa Game 2 sa iskor na 18-25, 25-16, 25-18, 23-25, 15-6.
“Yung team naman pare-pareho ang ginagawa kahit wala si Alyssa, yung ibang outside hitters nagpapakita sa ensayo. Nagrespond naman ang mga players nakuha namin itong championship,” ani Cremaline head coach Sherwin Meneses.
Nasungkit ni Carlos ang Conference MVP at First Best Outside Spiker awards.
Ito naman ang ikatlong Conference MVP ni Carlos matapos masikwat ang parehong parangal noong 2022 Open Conference at 2022 Invitational Conference. Napantayan ni Carlos si Alyssa Valdez na may pinakamaraming MVP awards sa liga.
Napasakamay naman ni Galanza ang Second Best Outside Spiker award habang Best Opposite Spiker naman si Gumabao,
Itinanghal na Best Setter at Finals MVP si Morado.
Winalis naman ng Petro Gazz ang Best Middle Blocker awards sa ngalan nina Remy Palma (First Best Middle Blocker) at MJ Phillips (Second Best Middle Blocker).
Naibulsa ni Kath Arado ng PLDT Home Fibr ang Best Libero.
- Latest
