Creamline pasok sa finals

MANILA, Philippines — Naipormalisa ng defending champion Creamline ang pag-entra sa finals matapos patalsikin ang F2 Logistics, 25-22, 25-23, 25-16, sa Game 2 ng PVL All-FIlipino Conference kahapon sa Mall of Asia Arena sa Pasay City.

Winalis ng Cool Smashers ang best-of-three semifinals series para masiguro ang pagbabalik sa finals.

Laglag sa battle-for-third ang Cargo Movers.

Samantala, napigilan ng PLDT Home Fibr ang Petro Gazz sa pamamagitan ng 14-25, 25-23, 25-14, 25-15 desisyon upang maipu­wersa ang rubber match .

Bumanat si opposite hitter Michelle Morente ng 16 puntos upang tulungan ang High Speed Hitters na maitabla sa 1-1 ang best-of-three semifinals series kontra sa Gazz Angels.

Nakauna ang Gazz Angels nang itarak nito ang 22-25, 25-29, 25-21, 25-18 panalo sa High Speed Hitters sa Game 1 ng serye noong Sabado.

Nakatuwang ni Mo­rente si Jovielyn Prado na naglatag ng solidong all-around game na 15 points, 11 digs at 10 receptions.

Nakalikom naman sina middle blocker Mika Reyes at outside hitter Meanne Mendrez ng tig-11 puntos habang naglatag ng solidong floor defense si libero Kath Arado na may 26 digs at 12 receptions.

“Nag-warmup pa kami sa first set sobrang slow start kami. Jinoke ko lang sa kanila na ok na yung first set basta sa second set and other sets na kunin na namin,” ani Petro Gazz head coach Rald Ricafort.

Nakaatake ang High Speed Hitters sa tulong ni playmaker Rhea Dimaculangan na nagtala ng 25 excellent sets.

Nanguna para sa Gazz Angels si wing spiker Jonah Sabete na humataw ng 13 puntos samantalang may tig-12 naman sina Aiza Maizo-Pontillas at Grethcel Soltones.

Subalit hindi ito sapat para makuha ng Gazz Angels ang panalo.

Dikdikan ang laban kung saan humataw ang High Speed Hitters ng 54 attacks — lamang lamang ng tatlo kumpara sa nagawa ng Gazz Angels.