Finals showdown pakay ng Creamline, Petro Gazz
MANILA, Philippines — Target ng defending champion Creamline at Petro Gazz na maiselyo ang finals showdown sa pagsagupa sa magkahiwalay na laban sa Game 2 ng 2023 Premier Volleyball League (PVL) All-Filipino Conference best-of-three semifinals series sa Mall of Asia Arena sa Pasay City.
Unang sasalang ang Gazz Angels na haharap sa PLDT High Speed Hitters sa alas-4 ng hapon habang lalarga naman ang Cool Smashers kontra sa F2 Logistics sa alas-6:30 ng gabi.
Abot kamay na ng Cool Smashers ang finals spot matapos igupo ang Cargo Movers, 26-24, 25-18, 22-25, 25-15, sa Game 1 ng serye noong Sabado.
“We’re just focused on our team. Whether Myla (Pablo) plays or not, we’ll prepare for F2,” pahayag ni Creamline head coach Sherwin Meneses.
Ipaparada ng Cool Smashers ang matikas na troika nina Michele Gumabao, Tots Carlos at Jema Galanza kasama pa sina middle blockers Jeanette Panaga at Ced Domingo at playmaker Jia Morado.
Hindi nakapaglaro si Pablo sa Game 1 dahil sa iniindang injury.
Ayaw naman isugal ni F2 head coach Regine Diego ang paglalaro ni Pablo dahil prayoridad nito ang kalusugan ng outside hitter.
“Priority namin yung health ng mga players,” ani Diego.
Dahil dito, kailangang kumayod ng husto nina Kim Kianna Dy, Aby Maraño, Ivy Lacsina at Ara Galang gayundin nina setter Kim Fajardo at libero Dawn Macandili.
Sa kabilang banda, nanaig ang Gazz Angels sa High Speed Hitters, 22-25, 25-19, 25-21, 25-18, sa hiwalay na laban.
Umaasa si Petro Gazz head coach Oliver Almadro na tatapusin na ng kanyang tropa ang serye ngunit kailangang maging solido ang kanilang laro para maisakatuparan ito.
“Steadiness of will, sound mind and ask for power (from God) and love of what we do. That’s the number one thing, if you love what you’re doing, your team, the things that are happening, most likely all positives will be coming out,” ani Almadro.
Isa sa aasahan ni Almadro si Jonah Sabete na nagpasabog ng 18 points at 11 receptions sa Game One.
Makakatuwang nito sina Aiza Pontillas, MJ Phillips at Grethcel Soltones.
Hindi naman basta-basta susuko ang PLDT dahil desido itong maipuwersa ang rubber match.
Papalo para sa High Speed Hitters sina Mika Reyes, Dell Palomata, Meanne Mendrez at Michelle Morente.
- Latest