Swim qualifying ginawang 4 days
MANILA, Philippines — Apat na araw idaraos ang qualifying event para makabuo ng aquatics team sa 32nd Southeast Asian Games na nakatakda sa Mayo sa Cambodia.
Tatakbo ang qualifying tournament mula Pebrero 16 hanggang 19 sa New Clark City Aquatics Center sa Capas, Tarlac.
Ito ang inihayag ni Stabilization Committee member Bones Floro kung saan mga certified technical officials ang magpapatakbo ng trials. May 34 swimming events para sa men at women ang itatanghal.
“Hiningi namin ang tulong ng continental body, ang Asian Swimming Federation, para sa mga pagsubok na ito,” ani Floro na deputy secretary general for international affairs ng Philippine Olympic Committee (POC).
May hanggang Pebrero 14 lamang maaaring magsumite ng entry.
“Ilalabas namin ang information kit at mga pamantayan sa pagpili simula ngayong linggo at ako ay nasisiyahan na nakatanggap kami ng maraming katanungan at layuning lumahok ng ibang atleta mula sa aming mga club at coaches,” dagdag ni Floro.
Kasama ni Floro sa Stabilization Committee sina Philippine Olympic Committee legal head Atty. Wharton Chan at Bases Conversion and Development Authority Senior Vice President for Corporate Services Group Arrey Perez.
Bukod sa swimming, pipipli rin ang Stabilization Committee ng mga isasabak sa men at women water polo at sa individual 3-meter springboard at platform sa diving.
- Latest
