San Miguel muntik na sa Magnolia

MANILA, Philippines — Itinagay ng San Miguel ang kanilang ikaapat na sunod na panalo matapos takasan ang Magnolia, 100-98, sa 2023 PBA Go­vernors’ Cup kahapon sa Smart Araneta Coliseum.

Kumolekta si import Ca­meron Clark ng 19 points at 10 rebounds, habang may 18 markers si Marcio Lassiter tampok ang anim na triples para sa pagsosyo ng Beermen sa Converge FiberXers at NLEX Road Warriors sa liderato.

Nag-ambag si CJ Pe­rez ng 17 points, ngunit na­imintis ang dalawang free throws sa huling 10.2 se­gundo ng laro.

Mabuti na lang at nasu­palpal ni Lassiter ang tangkang tres ni Paul Lee sa po­sesyon ng Hotshots na nahulog sa 0-3 marka.

Hinugot ng Magnolia si dating Terrafirma import Antonio Hester para palitan si Erik McCree.

Inilista ng San Miguel ang 100-91 abante sa hu­ling 1:18 minuto ng laro mula sa basket ni Clark.

Ngunit kumonekta si Mark Barroca ng tres at nag­dagdag ng dalawang basket si Calvin Abueva para idikit ang Hotshots sa 98-100 sa natitirang 18.7 se­gundo.

Samantala, nagsalpak si Dominick Fajardo ng 11 points sa 19-15 panalo ng Ca­vitex sa Pioneer Elasto­seal para pagharian ang Leg 4 ng PBA 3x3 Third Conference Season 2.

Binigo ng TNT Tropang Giga ang Platinum, 20-18, para sa third place.