Lastimosa isama sa Gilas Final 12 – Tiu
MANILA, Philippines — Malaki ang maitutulong ni Jerom Lastimosa sa Gilas Pilipinas sa sixth window ng FIBA World Cup Asian Qualifiers na idaraos sa Philippine Arena sa Bocaue, Bulacan.
Ito ang paniniwala ni Strong Group coach Charles Tiu dahil malalim ang talento ni Lastimosa na bagay sa sistema ng paglalaro ng Gilas Pilipinas.
Kasama si Lastimosa sa 24-man Gilas pool na pinangalanan ng Samahang Basketbol ng Pilipinas (SBP) na isasabak sa sixth window laban sa Lebanon sa Pebrero 24 at sa Jordan sa Pebrero 27.
Umaasa si Tou na mapapasama si Lastimosa sa Final 12 ng Gilas Pilipinas.
“I hope he (Lastimosa) makes it really. He is an unstoppable scorer who is a dead shot from the outside,” wika ni Tiu.
Bahagi si Lastimosa ng Strong Group na sumalang sa 32nd Dubai International Basketball Championship.
Nakalaban ng Pinoy squad sa torneo ang mga Lebanese club teams na Dynamo at Al Riyadi.
Kaya naman may ideya na si Lastimosa sa sistema ng laro ng mga Middle East countries.
“It will be a great experience especially since pretty much all of the Lebanese national team players that will be in that window, are all here in this tournament and he just competed against them and held his own,” sabi ni Tiu.
Ilan sa mga nakalaro ni Lastimosa sa Dubai meet ay sina 2022 FIBA Asia Cup MVP Wael Arajki at Amir Saoud.
- Latest
