Creamline sisimulan ang title defense

MANILA, Philippines — Simula na ng bakbakan ng mga matitikas na volleyball players sa bansa sa pagpalo ng Premier Volleyball League (PVL) All-Filipino Conference ngayong araw sa Smart Araneta Coliseum.

Bubuksan ng Creamline ang pagdedepensa sa titulo sa pagharap sa Reinforced Conference champion na Petro Gazz sa alas-6 ng gabi.

Magtutuos naman ang Akari Chargers at Choco Mucho sa alas-4 ng hapon.

Sa kabila ng pagkawala ni team captain Alyssa Valdez dahil sa knee injury ay nananatiling malakas ang lineup ng Cool Smashers.

Nariyan sina two-time MVP Tots Carlos, outside hitter Jema Galanza, middle blockers Ced Domingo at Jeanette Panaga, libero Kyla Atienza at playmaker Jia Morado.

Ba­gong coach ang ipa­pa­rada ng Petro Gazz sa ka­­tauhan ni dating Choco Mu­cho head coach Oliver Almadro na humalili kay Rald Ricafort.

Wala na sa Gazz Angels si top outside hitter My­la Pablo.

Ngunit pinalitan siya nina Des Clemente at Dzi Ger­vacio kasama sina Heather Guinoo at Jellie Tempiatura.

Bago rin ang head coach ng Choco Mucho ma­tapos italaga si dating men’s national volleyball team head coach Dante Alin­sunurin.

Hahataw para sa Flying Titans sina Kat Tolentino, Bea De Leon, Maddie Ma­dayang, Des Cheng, Cherry Nunag, Isa Molde at playmaker Deanna Wong.

Tatapatan ito ng Akari sa pangunguna ni Dindin Santiago-Manabat na mula sa Chery Tiggo.

Nakuha rin ng Chargers sina Camille Victoria (UST), Bang Pineda (Petro Gazz) at Eli Soyud (PLDT).