EJ kampeon sa France
MANILA, Philippines — Nasungkit ni Tokyo Olympics veteran Ernest John Obiena ang unang gintong medalya sa season na ito matapos pagharian ang Perche En Or men’s pole vault competition sa Roubaix, France.
Nairehistro ni Obiena ang impresibong 5.82 metro para masiguro ang unang puwesto sa natu-rang event.
Sinubukan pa ni Obiena na makuha ang 5.90 metro subalit bigo ito sa kanyang pagtatangka.
Tinalo ni Obiena si Yao Jie ng China na nagrehistro ng 5.75 metro na nagkasya lamang sa pilak.
Nasiguro naman ni Ethan Cormont ng France ang tanso bunsod ng naitala nitong 5.56 metro.
Ito ang ikalawang me-dalya ni Obiena sa taong ito.
Una nang nakahirit ng pilak si Obiena sa International Jump Meeting sa Cottbus, Germany kung saan nakapagtala ito ng 5.77 metro.
Nanguna sa naturang event si Sam Kendricks ng Amerika na nagtala ng dikit na 5.82 metro.
Nakalinya pa ang ilang malalaking torneong lalahukan ni Obiena sa taong ito upang mas lalong tumaas ang kanyang kumpiyansa.
Kabilang sa mga lalahukan ni Obiena ang World Championships na idaraos sa Budapest Hungary.
Dedepensahan din ni Obiena ang korona nito sa 32nd Souttheast Asian Games sa Phnom Penh, Cambodia sa Mayo.
Puntirya rin ni Obiena na masikwat ang gintong medalya sa Asian Games na idaraos naman sa Hangzhou, China kung saan paborito itong magkampeon at makapagtala ng bagong Asian record.
Kasalukuyang hawak ni Obiena ang Asian record na 5.91 metro na naitala nito noong nakaraang taon.
- Latest