Casugod lumundag sa Cignal
MANILA, Philippines — Ilang araw bago ang pagsisimula ng 2023 season, tuloy ang rigodon sa Premier Volleyball League (PVL).
Mula sa Akari Chargers, lumundag si middle blocker Gen Casugod sa Cignal HD Spikers para sa All-Filipino Conference ng liga na magsisimula sa Pebrero 4 sa Smart Araneta Coliseum.
Isang taon ding namalagi si Casugod sa kampo ng Chargers.
“Frontline help! The Iron Wall gets a power boost with Gen Casugod joining Team Awesome,” ayon sa post ng Cignal HD Spikers sa social media accounts nito.
Magiging reunion ito ng Far Eastern University players at coach dahil makakasama ni Casugod sa HD Spikers si dating FEU head coach Shaq Delos Santos.
Nasa HD Spikers din ang mga dating FEU players na sina FEU team captain Rachel Anne Daquis, playmaker Gel Cayuna, wing spiker Jerrili Malabanan, opposite hitter Chin Basas at setter Gyzelle Sy.
Malaki ang maitutulong ni Casugod sa front row ng HD Spikers kung saan makakatuwang nito sina middle blockers Ria Meneses at Roselyn Doria.
Nagtapos bilang runner-up ang HD Spikers sa PVL Reinforced Conference noong Disyembre.
- Latest
