Rondina-Gonzaga tandem pasok sa quarterfinals ng Pro Tour
SUBIC, Philippines — Umusad sina Sisi Rondina at Jovelyn Gonzaga sa quarterfinals matapos sapawan ang mga koponan ng Canada at Czech Republic sa Volleyball World Beach Pro Tour Futures kahapon dito sa Subic Bay Sand Court.
Tinalo nina Rondina at Gonzaga ang mga mas matatangkad na sina Darby Dunn at Olivia Grace Furlan ng Canada, 21-19, 21-18, sa morning match ng women’s main draw.
Matapos ang dalawang oras ay pinatumba naman ng dalawang Pinay sina Czechs Valerie Dvornikova at Anna Pospisilova, 21-14, 21-16, para palakasin ang kampanya ng bansa sa torneong inorganisa ng Philippine National Volleyball Federation (PNVF).
Nakatakda ngayon ang knockout quarterfinals.
Ito ang unang pagkakataon na nagtambal sina Gonzaga at Rondina sa isang international tournament.
Nauna nang nakatuwang ni Rondina si Bernadeth Pons sa pagkopo sa back-to-back Southeast Asian Games bronze medals.
Si Pons ay kasalukuyang nagpapagaling sa kanyang shoulder injury.
Samantala, umiskor sina Genesa Jane Eslapor at Floremel Rodriguez ng 21-7, 21-13 panalo kina Singaporean Eliza Hong at Zhao Rong Phua.
Ngunit yumukod sina Eslapor at Rodriguez kina Yahli Ashush at Anita Dave, 13-21, 16-21, ng Israel sa ikalawang laro.
Binigo naman nina Jude Garcia at Krung Arbasto sina Japanese Ryoto Sato at Ryo Shindo, 2-0, bago natalo kina Martin Plavins at Mikhail Samoilov, 19-21, 21-18, 7-15, ng Latvia sa men’s main draw.
- Latest
