Gazz Angels kampeon!
MANILA, Philippines — Nakumpleto ng Petro Gazz ang matamis na sweep matapos pataubin ang Cignal HD, 25-17, 25-22, 12-25, 25-22, upang angkinin ang ikalawang sunod na kampeonato kahapon sa PVL Reinforced Conference sa PhilSports Arena sa Pasig City.
Nagpasabog si American import Lindsey Vander Weide ng 19 puntos habang nakatuwang nito si middle blocker Remy Palma na humataw ng 18 markers tampok ang limang blocks.
Humataw din si outside hitter Myla Pablo ng 17 hits samantalang may 12 points naman si MJ Phillips para sa Gazz Angels.
Winalis ng Gazz Angels ang best-of-three championship series, 2-0.
Nakauna ang Gazz Angels sa serye matapos kubrahin ang dikdikang 25-21, 27-25, 37-35 panalo sa Game 1 noong Huwebes.
Sa unang laro, naipormalisa ng Creamline ang pagkopo sa bronze medal matapos pigilan ang Chery Tiggo, 25-15, 25-19, 23-25, 25-21, sa Game 2 ng best-of-three, battle-for-bronze match.
Isang all-Filipino lineup ang inilatag ng Cool Smashers dahil hindi naglaro si import Yeliz Basa.
Ngunit hindi ito naging problema para sa Creamline matapos magtala ng double figures ang limang players nito.
Inilabas ni two-time MVP Tots Carlos ang matikas na porma nito matapos kumana ng 19 puntos mula sa 17 attacks at dalawang aces para pamunuan ang Cool Smashers.
“Masaya kami na nakuha namin yung bronze and finally off season na. Ginawa naman namin yung trabaho namin. We’ve been working hard for the whole year,” ani Carlos.
Solido rin ang suporta ni outside hitter Jema Galanza na bumanat ng 16 markers at 12 digs habang gumawa naman si middle blocker Jeanette Panaga ng 14 hits.
- Latest
