Sports media ka-tandem ng PSC sa kanilang mga programa
MANILA, Philippines — Itinuturing ni Philippine Sports Commission (PSC) chairman Noli Eala ang sports media bilang partner para sa pagpapalawig ng kanilang mga programa sa buong bansa.
Ito ang sinabi kahapon ni Eala matapos pangunahan ang oath-taking ceremony ng mga bagong halal na opisyales ng Tabloids Organization in Philippine Sports, Inc. (TOPS) sa PSC Conference Room.
“Kinikilala ng pamahalaan at ng PSC ang samahan ng mga sportswriters bilang partner sa pagsulong ng mga programa para sa kabataang Pilipino at sa mga elite athletes na patuloy na nagbibigay ng karangalan at dangal sa ating bayan,” ani Eala.
Sinabi pa ni Eala, dating PBA Commissioner at naging PBA analyst, na mahalaga ang papel ng sports media dahil nabibigyan nito ng kahalagahan ang ginagawa ng pamahalaan para sa atleta gayundin ang pagtataguyod sa mga tagumpay ng atleta na siyang nagiging inspirasyon ng mga kabataan para magsikap at matularan ang nagawa ng kanilang mga idolo.
Kumpiyansa si Eala na walang magiging sagabal sa produktibong ugnayan ng PSC at ng TOPS.
Nagpasalamat din ang PSC chief sa TOPS sa paglalaan ng panahon upang mabigyan ng maayos na media coverage ang kanilang mga programa kabilang ang katatapos na PSC Women’s Martial Arts na pinangasiwaan ni Commissioner Bong Coo.
Sa darating na Disyembre 17-22 ay isasagawa ng PSC ang Batang Pinoy sa Vigan City.
Maigting na rin ang paghahanda ng mga atleta para sa lalahukang 32nd SEA Games, 19th Asian Games at 6th Asian Indoor Games sa 2023.
- Latest