Doncic umukit ng triple-double vs Warriors
DALLAS — Kumolekta si Luka Doncic ng 41 points, 12 assists at 12 rebounds para sa kanyang ika-51 career triple-double sa paggiya sa Mavericks sa 116-113 paglusot sa nagdedepensang Golden State Warriors.
Nagdagdag si Tim Hardaway Jr. ng 22 points tampok ang krusyal na three-pointer sa huling 1:49 minuto ng fourth period para sa pagpigil ng Dallas (10-10) sa kanilang four-game losing skid.
Pinamunuan naman ni Stephen Curry ang Golden State (11-11) sa kanyang 32 points at nag-ambag si Jonathan Kuminga ng 14 points at 10 rebounds.
Bumangon ang Warriors mula sa 17-point deficit sa first period para makadikit sa Mavericks sa 113-115, ngunit natawagan si Curry ng traveling violation sa huling 10 segundo.
Nagmintis naman si Klay Thompson sa kanyang 3-point attempt para sa Golden State matapos ang split ni Dorian Finney-Smith para sa 116-113 abante ng Dallas.
Sa Detroit, nagposte si Julius Randle ng season-high na 36 points para pamunuan ang New York Knicks (10-11) sa 140-110 paggupo sa Pistons (5-18).
Sa Portland, iniskor ni Norman Powell ang 22 sa kanyang 32 points sa fourth quarter para akayin ang Los Angeles Clippers (13-9) sa 118-112 panalo sa Trail Blazers (11-10).
- Latest
