BEST swimmers humataw ng 2 ginto sa UAAP competition
MANILA, Philippines — Mainit ang ratsada ng mga miyembro ng Philippines BEST (Behrouz Elite Swimming Team) sa UAAP Season 85 swimming tournament sa Rizal Memorial Swimming Pool sa Vito Cruz, Manila.
Bumanat ng tig-isang gintong medalya sina Ivan Radovan at Yohan Cabana upang banderahan ang University of Santo Tomas.
Pinagharian ni Radovan ang boys’ 800m freestyle sa impresibong 9:07.35 at pumangalawa ang kapwa UST tanker na si Aishel Cid Evangelista na nagtala ng 9:07.39.
Nasa ikatlong puwesto si Alejandro Carandang ng De La Salle (9:14.38).
Hindi rin nagpahuli si Cabana matapos kubrahin ang ginto sa boys’ 200m Individual Medley sa kanyang bilis na 2:15.74 para ungusan sina silver medalist Ivo Enot ng Ateneo (2:20.37) at bronze medalist Terrence Delvo ng UST (2:21.03).
Nakipagsanib-puwersa naman sina Radovan at Delvo kina Hugh Antonio Parto at Renz Santos para buhatin ang UST squad sa record-breaking performance sa boys’ 800m freestyle relay sa bagong 8:15.22 para wasakin ang dating rekord na 8:24.86 na naitala noong Agosto 11, 2018.
Gumawa rin ng ingay si Xiandi Chua ng La Salle nang angkinin ang ginto sa women’s 100m freestyle.
- Latest
