'Multiple physical injuries' inihain vs John Amores ng JRU matapos manapak sa NCAA
MANILA, Philippines — Naghain ng reklamong "multiple physical injuries" ang dalawang basketball players ng College of Saint Benilde matapos ang pananapak ng manlalaro ng Jose Rizal University na si John Amores sa NCAA game.
Biyernes nang magtungo sina Jimboy Pasturan at Traine Davis upang pormal na maghain ng reklamo sa San Juan City Prosecutor's Office matapos ang kontrobersyal na engkwentro.
"It's really an unfortunate incident and we felt that it really could have been avoided if they were able to keep emotions a bit in check," wika ni Benilde coach Charles Tiu sa sa panayam ng GMA.
"Tapos na sana. None of these should have happened... I guess that's part of life, it's part of basketball. I'm just thankful that nobody else got hurt."
Matatandaang biglang tinapos ang laro sa pagitan ng JRU at CSB kahit may 3:22 pa sa oras matapos mag-init ang ulo ni Amores na biglang sumugod sa bench ng Benilde. Nanalo ang St. Benilde sa puntos na 71-51.
Nagtamo ng black eye si Pasturan habang ipina-CT scan naman si David matapos makakuha ng concussion dahil sa pagkakasuntok sa kanyang panga.
Ika-9 lang ng Nobyembre nang ianunsyo ng NCAA ang indefinite suspension ni Amores dahil sa insidente. Pero hindi lang siya ang naparusahan. Kasama rin dito ang ilang JRU at CSB players.
"As dissappointing as it is, we asked the team to just learn to forgive whatever happened. But of course we will still take the right actions that need to be done," wika ni Tiu.
Hindi ito ang unang beses ngayong taon na nagkaroon ng violent outburst si Amores habang nasa gitna ng laro.
Nasuntok din ni Amores nitong ika-26 ng Hulyo ang player na si Mark Belmonte ng UP Men's Basketball Team habang nasa larong hinost ng Universities and Collegges Basketball League (UCBL).
Nagtamo ng gum fracture, teeth dislocation at mouth lacerations ang nabanggit.
- Latest
