Walang makapigil sa Dragons
MANILA, Philippines — Nalampasan ng guest team na Bay Area ang pagbangon ng Converge mula sa 22-point deficit para itawid ang 106-100 panalo sa 2022 PBA Commissioner’s Cup kahapon sa Smart Araneta Coliseum.
Kumamada si import Myles Powell ng 33 points, 8 rebounds at 3 assists para sa 4-0 record ng Dragons at patuloy na solohin ang liderato.
May 38 markers naman si import Quincy Miller sa panig ng FiberXers (1-2).
Bumalikwas ang Converge mula sa 69-91 pagkakabaon sa pagsisimula ng fourth period para makadikit sa 100-104 sa huling 1:29 minuto.
Ang dalawang free throws ni Powell sa natitirang 11 segundo ang sumelyo sa panalo ng Bay Area.
Sa unang laro, kumolekta si import Johnny O’Bryant ng 31 points, 9 rebounds, 4 assists at 3 steals sa 104-92 paggiba ng Meralco sa Terrafirma.
Nag-ambag si Allein Maliksi ng 18 markers kasunod ang tig-17 points nina Bong Quinto at Aaron Black para sa unang panalo ng Bolts matapos ang 0-2 panimula sa torneo.
Isang 12-2 bomba ang inihulog nina O’Bryant, Maliksi at Quinto sa fourth period para sa kanilang 96-82 paglayo.
Si assistant coach Luigi Trillo ang humalili kay Meralco coach Norman Black na inilagay sa PBA health and safety protocols.
Ito ang ikaapat na dikit na kabiguan ng Dyip at pang-20 simula noong 2021 PBA Governor’s Cup.
Nauna nang nagtala ang Blackwater ng PBA record na 29-game losing slump.
- Latest