Suarez handa kay Magali
MANILA, Philippines — Idedepensa ni Charly Suarez ang kanyang suot na World Boxing Association (WBA) Asia super featherweight title laban kay Philippine champion Carlo Magali sa Oktubre 23 sa Elorde Boxing Center sa Parañaque City.
Kumpiyansa si Suarez, isang one-time Olympian at multi-medalist sa Southeast Asian Games, na tatalunin niya si Magali.
“Ready naman tayo. Since nasa national team ako, tinandaan ko na maihanda ang sarili ko physically and mentally,” sabi ng 33-anyos na tubong Sawata, Davao del Norte sa Tabloids Organization in Philippine Sports, Inc. (TOPS) ‘Usapang Sports’ noong Huwebes sa Behrouz Persian Cuisine sa Quezon City.
Kasalukuyang No. 36 si Suarez sa World Boxing Council (WBC) na pinaghaharian ni American Shakur Stevenson.
Hawak ni Suarez ang 12-0-0 win-loss draw ring record tampok ang pitong knockouts.
Nakuha ni Suarez ang bakanteng WBA Asia belt mula sa 12th round technical knockout win kay Tomjune Mangubat.
“Malaking pangalan na rin siya sa boxing kaya hindi kami nagpapasiguro,” sabi ni coach Delfin Boholst kay Magali.
Bitbit ni Magali ang 25-0-0 (13 KOs) card.
Nakatakda sana siyang lumaban noong Agosto 21 ngunit nakansela ang duwelo niya kay Ayanda Nkosi para sa World Boxing Federation (WBF) lightweight crown.
- Latest
