Sotto bokya sa kabiguan ng 36ers sa Thunder
MANILA, Philippines — Nakalasap ng malupit na 98-131 kabiguan si Kai Sotto at ang Adelaide 36ers kontra sa Oklahoma City Thunder sa pagtatapos ng NBL X NBA Tour sa Paycom Center sa Oklahoma.
Bagama’t umiskor ng malaking 134-124 kontra sa Phoenix Suns ay nanlamig ang 36ers at hindi na nakauilit pa sa isang de-kalibreng NBA team na Thunder.
Muling bumandera sina Craig Randall at Robert Franks para sa Adelaide sa kanilang 27 at 20 points, ayon sa pagkakasunod.
Bigong makapag-ambag si Sotto na hindi nakaiskor sa loob ng siyam na minutong paglalaro.
Kontra sa Suns ay naglista si Sotto ng 11 points, 2 rebounds, 2 steals at 1 assist.
Sa naturang panalo ay umukit ng kasaysayan ang 36ers nang maging unang overseas team simula noong 2015 na nakatalo sa isang NBA team.
Huling nagawa ito ng Fenerbahce ng Turkey kontra sa Brooklyn Nets, 101-96.
Anim na players ang tumipa ng double digits sa balanseng atake ng Thunder, naglaro na wala si No. 2 pick Chet Holmgren, sa pangunguna ng 23 markers niTre Mann.
Sa kabila ng kabiguan ay magandang karanasan ang mabibitbit ng Adelaide pauwi sa Australia upang maghanda sa kampanya sa 2022-2023 NBL regular season.
- Latest
