Liderato asam ng Maroons
MANILA, Philippines — Pakay ng nagdedepensang University of the Philippines na masolo ang liderato sa pagsagupa sa Far Eastern University sa UAAP Season 85 men’s basketball tournament a Smart Araneta Coliseum.
Hahataw ang bakbakan ng Fighting Maroons at Tamaraws ngayong alas-4 ng hapon matapos ang duwelo ng UE Red Warriors at Adamson Soaring Falcons sa alas-2.
Magkasalo ang UP at Ateneo sa top spot tangan ang parehong 2-0 record.
Mainit ang simula ng Fighting Maroons na kumonekta kaagad ng dalawang sunod na panalo.
Sa kanilang huling laro ay naitakas ng UP ang 87-78 overtime win kontra sa Adamson.
Wala si JD Cagulangan sa lineup na nagpapagaling pa sa injury subalit nariyan naman si Terrence Fortea.
“I think unti-unti, siguro habang wala si Maimai (Cagulangan) ay nabibigyan siya ng time at nag-iimprove siya,” ani Fighting Maroons coach Goldwin Monteverde kay Fortea.
Hahataw rin para sa UP sina Gilas Pilipinas standout Carl Tamayo, Zavier Lucero at Malick Diouf.
Hangad naman ng Tamaraws na makasama sa win column matapos lumasap ng dalawang sunod na kabiguan kasama ang 66-76 pagkatalo sa UE.
- Latest