Bay Area sosolohin ang liderato
MANILA, Philippines — Ito na ang magiging huling laro ni dating NBA guard Myles Powell para sa guest team na Bay Area bago siya palitan ni Andrew Nicholson bilang import sa kanilang susunod na apat na laro.
Isang reinforcement lang kasi ang pinapayagan para sa 12 regular PBA ball clubs sa 2022 Commissioner’s Cup.
Babanderahan ni Powell, pupuntiryahin ng Dragons ang solong liderato sa pagharap sa Converge FiberXers ngayong alas-5:45 ng hapon sa Smart Araneta Coliseum.
Umiskor ang Bay Area, may 3-0 record kasosyo ang Magnolia sa liderato, ng 101-91 panalo sa Phoenix kung saan nagkasagutan sina Powell at coach Topex Robinson.
“There’s a lot of emotion, lot of energy towards this international team,” ani Dragons’ coach Brian Goorjian.
Pilit namang babangon ang Converge (1-1) mula sa 105-109 pagyukod sa Magnolia sa likod ni import Quincy Miles.
Sa unang laro sa alas-3 ng hapon ay magtatagpo ang Meralco (0-2) at Terrafirma (0-3) na nasa 19-game losing slump simula noong 2021 PBA Governor’s Cup.
Nakatikim ang Bolts ng 95-101 overtime loss sa NorthPort Batang Pier (2-1), habang nagmula ang Dyip sa 94-106 pagsuko sa Rain or Shine Elasto Painters (2-1).
- Latest
