Gilas tuloy ang ensayo
MANILA, Philippines — Tuloy ang ensayo ng Gilas Pilipinas para paghandaan ang fifth window ng FIBA World Cup Asian Qualifiers na idaraos sa susunod na buwan.
May 16 players ang dumating sa ensayo ng Gilas Pilipinas noong Lunes ng gabi sa Meralco Gym.
Kabilang na rito si Chris Newsome ng Meralco Bolts bagamat hindi ito nasilayan sa aksyon dahil sa iniinda nitong injury.
Nasa Meralco gym din sina Ginebra coach, Tim Cone, Gilas head coach Chot Reyes at assistant coach Josh Reyes.
“We told the players, some of them had games last night (Sunday). Everyone has also practiced today (Monday), so we’re not gonna overextend them,” ani Chot.
Dumalo rin sa training camp si Barangay Ginebra import Justin Brownlee na itinutulak na maging naturalized player ng Gilas.
Kasama nito sina Gin Kings players reigning Most Valuable Player Scottie Thompson, Gilas mainstay Japeth Aguilar at Jamie Malonzo.
Galing ang mga ito sa panalo ng Gin Kings laban sa Bolts, 99-91.
“We have specific things that we want to achieve. So today, we wanted to achieve a couple of things done and they went hard right away. These guys are in shape, but more importantly get the opportunity of playing together,” dagdag ni Chot.
Ilan pa sa players ng San Miguel Beer at TNT ang dumating sa ensayo na bahagi ng paghahanda ng Gilas sa laban nito kontra sa Jordan at Saudi Arabia.
Ito ay sina six-time PBA MVP June Mar Fajardo, CJ Perez, Roger Pogoy, Poy Erram at Calvin Oftana.
Nagsanay din sina college stars Carl Tamayo ng University of the Philippines, Kevin Quiambao ng La Salle at Angelo Kouame ng Ateneo.
- Latest
