Blazers solo na sa No. 1
MANILA, Philippines — Napasuko ng College of Saint Benilde ang Emilio Aguinaldo College, 73-61, upang masolo ang liderato sa National Collegiate Athletic Association (NCAA) Season 98 men’s basketball kahapon sa The Arena sa San Juan City.
Muling naasahan ng Blazers si Migs Oczon na kumana ng 14 puntos, limang rebounds at tatlong assists para hatakin ang kanilang tropa sa ikalimang panalo sa anim na laro.
Nakalikom pa si Miguel Corteza ng 12 markers, walong boards at dalawang blocks habang humataw din si Gilas Pilipinas standout Will Gozum na bumanat ng double-double output na 11 points at 13 rebounds.
“I always say that I’m scared with teams na may losing streak. But I like EAC, I like coach Oliver. They are a good team. Their struggles are really surprising me,” ani Benilde head coach Charles Tiu.
Aminado si Tiu na bahagyang nahirapan ang Blazers bago pasukuin ang Generals na naglatag ng matinding depensa.
Nakatuwang pa ng Blazers si JC Cullar na umiskor ng walong puntos, limang boards at apat na assists samantalang nagdagdag si Prince Carlos ng siyam na puntos, tatlong rebounds at dalawang assists.
Wala pa ring panalo ang Generals sa limang laro para manatili sa ilalim ng standings.
Samantala, pinawalang bisa ng liga ang 66-55 panalo ng Mapua laban sa San Beda noong Setyembre 10 matapos paglaruin si Gab Gamboa na di umano ay cross-enrolled sa St. Clare College sa Caloocan.
Bunga nito, umangat ang Red Lions sa 4-1 win-loss slate habang nabaon ang Cardinals sa 0-6 karta.
- Latest
