UAAP sasambulat ngayon!
MANILA, Philippines — Aarangkada na ang prestihiyosong UAAP Season 85 men’s basketball tournament ngayon tampok ang apat na koponang mag-uunahang makakuha ng unang panalo sa Mall of Asia Arena sa Pasay City.
Nangunguna sa listahan ang defending champion University of the Philippines na sisimulan ang kanilang title defense laban sa De La Salle University sa alas-4 ng hapon.
Bago ito, masisilayan muna ang bakbakan ng season host Adamson University at University of Santo Tomas sa alas-2.
Nakasentro ang atensiyon ng lahat sa Fighting Maroons.
Bagama’t dalawang key players ang wala sa lineup ng UP — si Ricci Rivero na nakatakdang maglaro sa isang commercial league sa Taiwan at si CJ Cansino na nagpapagaling pa sa injury — nananatiling malakas ang Fighting Maroons dahil solido pa rin ang lineup nito.
Pamumunuan ang UP ni Gilas standout Carl Tamayo kasama sina Zavier Lucero, JD Cagulangan at Malick Diouf na tunay na maaasahan ni UP head coach Godlwin Monteverde.
Nadagdagan pa ito nina Henry Galinato at Cyril Gonzales.
Sumalang pa ang UP sa ilang serye ng tuneup game sa South Korea para mas lalong mapalakas ang tropa nito.
“We want to teach them on how to play together dahil malaking factor yung chemistry,” ani Monteverde.
Sa kabilang banda, galing ang La Salle sa matagumpay na preseason campaign kung saan nagkampeon ito sa 2022 PBA D-League Aspirants Cup at tanso naman sa Preseason Cup.
Malaking butas ang pagkawala nina Justine Baltazar at Kurt Lojera.
Ngunit malalim ang lineup ng Green Archers dahil nariyan pa sina Michael Phillips, Schonny Winston, Mark Nonoy at Evan Nelle kasama ang baguhang si Kevin Quiambao.
Nais din ng La Salle na makabawi sa UP dahil ang Fighting Maroons ang nagpatalsik sa kanila sa Final Four noong nakaraang season.
- Latest