2 pares na sagupaan sa PBA kanselado dahil kay ‘Karding’
MANILA, Philippines — Para sa kaligtasan ng mga players, coaches at fans ay nagdesisyon ang Philippine Basketball Association (PBA) na ipagpaliban ang doubleheader ng 2022 Commissioner’s Cup na nakatakda kahapon.
Ito ay dahil sa pananalasa ng super bagyong ‘Karding’ sa Metro Manila at mga probinsya.
“The PBA Commissioner’s Cup games today at the MOA Arena will be postponed due to Super Typhoon Karding. Meralco vs. NLEX and Converge vs. Ginebra will be rescheduled to a later date,” pahayag ng PBA.“Mag-ingat po tayong lahat!”
Ipinagpaliban din ng PBA ang Leg 3 ng PBA 3x3 Season 2 na nakatakda sana ngayon at bukas sa Robinson’s Place Antipolo Extension.
Haharapin sana ng NLEX ang Meralco sa alas-4:30 ng hapon kasunod ang bakbakan ng Barangay Ginebra at Converge sa alas-6:45 ng gabi sa MOA Arena sa Pasay City.
Si long-time assistant coach Adonis Tierra ang pansamantalang gumiya sa NLEX, habang sa Setyembre 30 pa inaasahang opisyal na hahawakan ni Frankie Lim ang Road Warriors.
Ito ay dahil sa pagsisilbi niya ng one-game suspension mula sa kanyang physical contact kay dating Alaska forward Calvin Abueva sa 2015 PBA Governors Cup quarterfinals game ng Aces at Gin Kings.
Dahil nasibak ang Ginebra ay hindi na naipataw kay Lim ang naturang suspensyon.
- Latest