Yulo inangkin ang gold sa All-Japan Seniors Championships
MANILA, Philippines — Tuluy-tuloy ang paghahanda ni two-time world gymnastics champion Caloy Yulo para sa malalaking international competitions, partikular na sa 2024 Olympic Games sa Paris, France.
Inangkin ni Yulo ang gold medal sa men’s floor exercise ng 55th All-Japan Seniors Championship sa kabila ng injury sa kanyang daliri.
Kumolekta rin ang seven-time Southeast Asian Games gold winner ng isang silver sa team event at isang bronze sa vault, ayon kay Japanese coach Munehiro Kugimiya.
Hindi nakalahok ang 22-anyos na Batang Maynila sa iba pang apparatus dahil sa kanyang injury sa daliri.
Pinaghahandaan ni Yulo ang 2022 World Artistic Gymnastics Championship na nakatakda sa Oktubre 29 hanggang Nobyembre 6 sa Liverpool, United Kingdom.
Magtutungo ang three-time Asian Championships winner sa Paris para sa isang training camp bago dumiretso sa Liverpool para sa World Championship.
Inangkin ng 4-foot-11 na si Yulo ang gold medal sa vault event at silver sa floor exercise noong 2021 World Championship sa Kitakyusu, Japan.
Bigo si Yulo na makakolekta ng anumang medalya noong Tokyo Olympics at hangad na makalahok sa floor exercise, vault, parallel bars at individual all-around sa Paris Games.
- Latest
